El primer fin de selmana del mes d’avientu el Conceyu Bimenes entama les XVIII Xornaes Gastronómiques del Gochu y la X Feria Agroalimentaria, dambos eventos organizaos cola collaboración de l’Axencia de Desarrollu Local de la Mancomunidá Comarca de la Sidra, la Conseyería d’Agroganadería y Recursos Autóctonos del Principáu d’Asturies, Caxastur y l’Asociación de Vecinos de Suares. Nes xornaes gastronómiques, que se van cellebrar los díes 6 y 7 d’avientu, van participar cuatro establecimientos hosteleros qu’ufiertarán menús a un preciu de 20 €: Mesón San Cipriano (Rozaes), Restaurante Casa Manuela (Santuyano), Bar El Llugar (Suares) y Asador Noval (El Cuitu). La novedá d’esti añu va ser la participación del Bar Vigil (Santuyano), qu’ufiertará tapes especiales. Coincidiendo coles xornaes entámase tamién la feria agroalimentaria, que va tener llugar el 7 d’avientu na pista cubierta del C. P. Martimporra, ente les 10’30 y les 14’30 h. La mesma cuntará con una bona riestra d’espositores que van mostrar y vender variaos productos agroalimentarios. Amás, tarán presentes dellos puestos d’artesanía. De la mesma manera, nel trescursu la mañana va desendolcase un bon garrapiellu d’actividaes: preba gratuita de sidra natural (cola collaboración de Sidra Menéndez); actuaciones musicales y de baille de Los Yerbatos y d’El Corriellu la Pandorga; taller de manualidaes pa neños (a cargu de l’Asociación Sociocultural Sofitando) y –novedá na presente edición– tamién se podrá ver la esposición “Asturianines. Muñeques col traxe tradicional asturianu” (colección de Carmen Pandiella). En resume, un bon fin de selmana pa pasar per Bimenes.

Archivo Adjunto:

TRÍPTICU Xornaes Gastronómiques Gochu 2014