El prósimu miércoles, 25 de marzu, la Casa Cultura de Bimenes, allugada nel pueblu de Santuyano, va acoyer un homenaxe a Maximiliano Amable Vallina González, Mable’l de Melendreros. L’actu, que se va desendolcar de magar les 18’30 hores, ta entamáu pol Conceyu Bimenes, que d’esta manera quier reconocer públicamente’l llabor d’esti vecín enfotáu en defender y da-y puxu al texu, árbole sagráu de la nuesa milenaria cultura. Mable, con cuasi 95 años d’edá, sigue plantando texos y mirando con procuru polos esistentes en Bimenes, especialmente na Xerra de Peñamayor. Nel trescursu del actu van falar Alejandro Canteli, Alcalde de Bimenes; Ana López, d’Amigos del Texu; Berto Peña, de la Fundación Belenos; y el naturalista, escritor y gran collaciu del homenaxeáu Ignacio Abella.